Tolosaldeko Hitza

Bederatzi urteko geldialdiaren ondoren, bere laugarren diskoa aurkeztu dute Deabruak Teilatuetan taldekoek. 1998an, "Hau da ene ondasun guztia" lanarekin gero arte esan zien beraien jarraitzaile guztiei, eta orain, ia hamar urte beranduago, "1973"rekin, berriro hemen eta elkarrekin direla erakutsi dute.

"1973" izenburupean, hamaika kantu berri biltzen ditu argitalpenak. Taldekideen esanetan, «aurreko diskoen antzekoa bada ere, 10 urteko ikuspegia nabari da». Aritz Mendieta (ahotsa), Iñigo Arruti (bateria, perkusioa, koroak), Joni Ubeda (Baxua, koroak) eta Imanol Ubedak (Gitarra, koroak) osatzen dute laukotea, eta gogotsu datoz beraien lan berriarekin.
"1973" Bonberenea ekintzak-ekin argitaratu dute. Grabaketa lanak, aurrekoetan bezala, Kaki Arkarazorekin egin dituzte, Andoaingo Garate estudioetan. Kantu ia denak beraiek konposatu dituzte, bat izan ezik. Ez baletor inor abestiko hitzak «beraiek oso gustuko duten» azpeitiar poeta batek idatzi ditu, Jose Luis Otamendik hain zuzen ere. Diskoaren diseinua Joseba Poncek egin du. Mendietak azaldu bezala, «oso gustura geratu gara diseinuarekin, gauza sinplea baina duina egitea nahi genuen eta horrela izan da». Dena den, orain, bi hilabete inguru itxaron beharko dira beraien zuzeneko emanaldiez gozatzeko. Izan ere, lehen kontzertua abenduaren 29an emango dute, Bonberenean.